Er yr ymgyrch i'w bardduo, roedd Nate Silver yn agos iawn ati yn y diwedd. Dyma fuddugoliaeth felly i fathemateg. Mae llawer o sylwebwyr proffesiynol yn bryderus, gan fod y sefyllfa yma'n bygwth eu bywoliaeth. Unwaith y mae ymgyrch wedi dechrau, y cyfan a wna Silver yw mewnbynnu ffigurau arolygon barn a ddarperir gan eraill yn gyhoeddus. Mae llwyddiant y model yma'n peryglu hygrededd yr arbenigwyr honedig eraill yma, gyda'u proffwydoliaethau gwag wedi'u seilio ar ddim mwy na dyheadau personol a theimladau annelwig ym mêr yr esgyrn. Tynnu rhifau allan o'r pen-ôl, mewn geiriau eraill. Rwy'n disgwyl y bydd gan bob papur newydd a sianel deledu rywun tebyg i Silver i 'grensian y rhifau' erbyn yr etholiad arlywyddol nesaf yn 2016.
Yn y cyfamser, mae'r paranoia gwallgof o du'r dde eithafol wedi dechrau'n barod. Efallai fy mod yn rhy hoff o lawer o ddarllen pethau fel hyn, efallai. Mae rhefru lloerig yma gan Donald Trump yn enwedig yn werth ei weld.
Nid ymffrostio'n unig yw diben y cofnod yma chwaith; nid wyf yn arbennig o hoff o Obama, wedi'r cyfan. Ond hoffwn nodi fy mod wedi rhagweld yn gywir mai ymateb y ffwndamentalwyr crefyddol i golled Romney fydd ceisio gwthio'r Gweriniaethwyr ymhellach byth i'r dde. Er enghraifft, gweler yr hyn a ddywedwyd heddiw gan Bryan Fischer, pennaeth yr American Family Association:
Whatever solution is for GOP, it's not to move to the center. Do that, have no reason to exist. Go conservative or go home.
— Bryan Fischer (@BryanJFischer) November 7, 2012
Nid ffigwr ymylol mo'r dyn yma. Mae'n ddyn dylanwadol, a'r AFA yw un o brif sefydliadau'r dde grefyddol. Yn wir, yn gynharach heddiw bu Herman Cain, a oedd ar un adeg yn edrych fel petai ganddo obaith gwirioneddol yn y ras i ennill enwebiad y Gweriniaethwyr, ar raglen radio Fischer:
BREAKING: Guest Herman Cain calls for a third party: youtu.Q3xghOTckM via @youtube
— Bryan Fischer (@BryanJFischer) November 7, 2012
Mae hyn yn sicr yn atgyfnerthu'r syniad ei bod am fod yn dasg anferthol i rwystro'r Blaid Weriniaethol rhag rhwygo.
Hoffwn ychwanegu at yr hyn a ddywedais ddoe, fodd bynnag, trwy nodi mai prif flaenoriaeth y Gweriniaethwyr, rwy'n credu, fydd rhoi'r gorau i'w hagwedd hallt tuag at fewnfudwyr. Mae hispaniaid, yn ddealladwy, yn tueddu i ffafrio'r Democratiaid gan mai polisi swyddogol y Gweriniaethwyr, i bob pwrpas, yw eu hyrddio i gyd dros y ffin i Fecsico. Mae demograffeg yn ffafrio'r Democratiaid yn hyn o beth: mae lleiafrifoedd ethnig fel hispaniaid yn gyfran gynyddol o etholwyr y wlad. Bydd unrhyw feddalu yn agwedd y Gweriniaethwyr tuag at fewnfudo'n sicr o ennyn cryn udo a phrotestio gan yr eithafwyr, ond mae'n wirioneddol hanfodol.
Gobaith arbennig y blaid yn hyn o beth yw dyn o'r enw Marco Rubio, seneddwr Gweriniaethol ifanc o Florida. Symudodd rieni Rubio i America er mwyn ffoi rhag chwyldro Castro yng Nghiwba, ac mae yna gryn gyffro ynghylch ei ddyfodol. Os yw'r Gweriniaethwyr am ddenu hispaniaid - a'r consensws yw nad oes ganddynt fawr o ddewis - yna Rubio yw'r cyfrwng amlwg. Mae llawer o Weriniaethwyr yn ei ystyried yn fersiwn hispanaidd a cheidwadol o Barack Obama.
Nid wyf yn ddyn betio, ar y cyfan, ond rwy'n credu bod rhoi swm sylweddol o arian ar Rubio i ennill enwebiad ei blaid yn 2016 yn fuddsoddiad craff.
Y gwahaniaeth amlwg rhwng gwleidyddiaeth pleidiol yr UDA a Phrydain yw nad oes yna 'arweinydd plaid'. Yn hytrach na chael ei arwain gan weledigaeth un dyn (neu ddynes - Hillary 2016 etc) mae cyfeiriad pleidiau yn tueddu i gael ei benderfynu gan ogwydd gwleidyddol y mwyafrif o'r rheini sydd wedi eu hethol i'r Senedd a Thy'r Cynrychiolwyr. Felly mae'n anochel i raddau yn fy nhyb i y bydd y Gweriniaethwyr yn datblygu'r blaid mwy cymhedrol, wrth i'r UDA symud i'r chwith, am na fydd aelodau'r Tea Party yn y mwyafrif ymysg cynrychiolwyr etholedig y blaid. Mae llwyddiant yn golygu popeth yn America - fydd y blaid ddim yn glynu at ideoleg sydd wedi methu yn rhy hir.
ReplyDelete