Ar ôl i Romney golli, beth nesaf i'r Gweriniaethwyr?

Er gwaethaf llawer o'r penawdau sy'n awgrymu bod etholiad arlywyddol America yn rhy dynn i ni allu ei rhagweld yn hyderus, y gwir yw bod Barack Obama'n debygol iawn o gael ei ail-ethol heno. Mae'r penawdau'n iawn i'r graddau bod y bleidlais boblogaidd yn debygol o fod yn hynod agos, ond mae system etholiadol ryfedd y wlad yn golygu bod Obama bron yn sicr o ennill mwy o'r pleidleisiau etholiadol hynny sydd eu hangen.

Fel rwyf wedi'i ddweud, mae llawer o geidwadwyr yr Unol Daleithiau fel petaent wedi creu rhyw fath o realaeth amgen, gan fod llawer wir yn credu bod Romney am lwyddo'n gyfforddus. Canlyniad hyn fydd siom enfawr i filiynau lawer ohonynt dros nos.

Sut fydd y Blaid Weriniaethol yn ymateb, tybed? Mae lle i gredu bod y camarwain yma ynghylch cyflwr ymgyrch eu hymgeisydd yn fodd bwriadol o danseilio a chwestiynu gwir ganlyniad yr etholiad o flaen llaw.

Ers i Obama ddod i'r amlwg, mae yna garfan gwallgof ond swnllyd sydd wedi bod yn honni nad ydyw'n gymwys i fod yn arlywydd gan nad ydyw'n Americanwr 'go iawn'. Yn ôl y bobl od yma, ganed Obama yn Kenya (yr ateb cywir yw Honolulu, a Hawaii yw'r 50fed o daleithiau America). Yn yr un modd, mae'n frawychus cymaint o Americanwyr sy'n credu bod y dyn yn fwslem (nid am fod y posibilrwydd hwnnw mor ofnadwy ynddo'i hun, ond oherwydd ei bod mor hysbys ei fod yn gristion o gryn argyhoeddiad). Mae'n amlwg felly bod canran sylweddol o boblogaeth America'n amheus iawn o'r dyn du hwn gyda'i enw rhyfedd, a diben y camargraffiadau yma yw ei bortreadu fel yr 'Arall'. Trwy awgrymu bod buddugoliaeth Obama rywsut yn sioc, gall hynny fod yn ddigon i ddarbwyllo miliynau o geidwadwyr anwyboddus bod yr etholiad rhywsut wedi'i hennill trwy ddirgel dwyll (er mai'r gwrthwyneb sy'n wir: mae gan y Blaid Weriniaethol bolisi swyddogol o geisio rhwystro cymaint o Ddemocratiaid rhag pleidleisio ag sy'n bosibl).

Fy mhwynt yw bod cefnogwyr craidd y Gweriniaethwyr - y Tea Party bondigrybwyll - yn debygol o fynd yn fwy eithafol byth ar ôl heddiw, nid llai. Gallwn ddisgwyl llawer iawn mwy o conspiracy theories a militias hanner-pan yn Wyoming a De Carolina'n paratoi chwyldro arfog.

Mae'r Gweriniaethwyr yn ddibynnol iawn ar y dde gristnogol ffwndamentalaidd. Gallaf eich sicrhau bod aelodau amlwg o'r garfan honno am fynnu mai problem Romney oedd nad oedd wedi bod yn ddigon ceidwadol. Wedi'r cyfan, roedd Romney (cyn-lywodraethwr Massachusetts) yn fwy cymhedrol o lawer na'i brif wrthwynebwyr Gweriniaethol a gystadlodd ag ef am enwebiad y blaid yn gynharach yn y flwyddyn.

Mae hyn yn broblem enfawr i'w blaid. Mae'r Gweriniaethwyr wedi symud cryn dipyn i'r dde ers dyddiau Ronald Reagan yn yr 1980au. Ers 2008, fodd bynnag, ac oherwydd dylanwad y Tea Party, maent wedi gwasgu'u traed ar y sbardun o ddifrif. Y peth diddorol yw bod y boblogaeth yn gyffredinol, ar rai pynciau cymdeithasol megis priodasau cyfunrywiol o leiaf, wedi symud i'r cyfeiriad arall. Ar ddechrau'r 2000au, roedd yn amhosibl dychmygu unrhyw dalaith yn caniatáu i ddau berson o'r un rhyw briodi'i gilydd. Erbyn hyn, fodd bynnag, maent yn gyfreithlon mewn chwe thalaith. Yn fwy na hynny, mae tair talaith (Maine, Maryland a Washington) yn cynnal refferendwm ar eu cyfreithloni heddiw, ac mae'r arolygon yn ffafrio'r ochr gywir ym mhob un. Dyna fyddai'r tro cyntaf i etholwyr gyfreithloni priodasau cyfunrywiol yn uniongyrchol. Mae'r newid cymdeithasol, felly, wedi bod yn wirioneddol syfrdanol.

Fel rheol, pan mae symud cymdeithasol sylfaenol fel hyn ar y gweill, mae'r gwrthwynebwyr yn cynddeiriogi fwy fyth a'n gwneud mwy a mwy o sŵn. Dyma sydd i gyfrif am y ffaith bod y Blaid Weriniaethol a chymdeithas ehangach yn symud i gyfeiriadau gwahanol.  Nid gormodiaith yw dweud bod dyfodol y blaid ei hun yn y fantol. Cyn hyn, mae wedi llwyddo i blesio'r eithafwyr craidd ac ennill etholiadau cenedlaethol ar yr un pryd. Rwy'n credu bellach bod y dyddiau hynny'n prysur ddirwyn i ben. Rhywbryd yn ystod y degawd nesaf, mae rhywbeth ysgytwol am orfod digwydd. Ni fyddai'n ormod o syndod yn y pen draw pe holltir y blaid. Nid wyf yn credu y daw i hynny, ond mae'n mynd i fod yn broses boenus tu hwnt. Rwy'n edrych ymlaen i wylio hyn i gyd, a bydd rhaid archebu digon o bopcorn o flaen llaw.

Nid yw'r Democratiaid wedi meddianu'r Tŷ Gwyn am fwy nag wyth mlynedd yn olynol ers dyddiau Franklin D Roosevelt a Harry Truman. O gofio hefyd bod yr economi'n debygol o wella rhwng hyn a 2016 (nid o reidrwydd oherwydd unrhyw beth y mae Obama'n debygol o'i wneud, ond oherwydd bod y pethau yma'n tueddu i fynd i fyny a lawr yn naturiol), rwy'n dechrau teimlo bod Democrat arall am fod yn ffefryn wedi i Obama ymddeol. Yn wahanol i'm proffwydoliaeth am y canlyniad heno, fodd bynnag, mae'n amhosibl bod yn rhy hyderus am hynny!